S'Chreschtchend chonnt baud - Songtext

S’Müeti setzt doss of em Bank
Dr Ätti blibt denn – är esch chrank
Doss wird’s schnäu donku ond chaut
Fröi Di, s’Chreschtchend chonnt baud

Se hei e Spiisröhrechräbs diagnostiziert
Ond ehn met Chemo drgäge therapiert
Z’erscht eschs em schlächt gse, d’Hoor si drvoo
Ond dr Ätti seit: So cha’s nömm wittergoo

Am Waudrand dört äse s’paar Reh
S’Müeti trenkt es Hagebotte-Tee
Dr Ätti füut sech onändlech aut
Fröi Di, s’Chreschtchend chonnt baud

S’Müeti het gseit, settsch Du müese goo
So wetti ganz secher met Deer cho
Noch 50-Johr zämeläbe, einsam sii
Das wotti ned, das cha’s ned sii

D’Schneeflocke die tanze im Wend
S’Müeti lesmet för d’Änkuchend
Se hofft, dass was si lesmet ou g’faut
Fröi Di, s’Chreschtchend chonnt baud

S’Teschtamänt hei si beidi gschrebe
Ond es Hüsli ond chli Bargäud si ou no blebe
Stouz chöi si sii, was si aus hei gschafft
Doch se möge nömm, s’goht uus dr Saft

S’Müeti setzt doss of em Bank
Dr Ätti hoout s’Schtormgwehr us em Schrank
Du ghörsch wie’s zwöimou knaut... ond verhaaut
Fröie Dich, s’Chreschtchend chonnt baud (3x)

zurück